Ka pēhea koe e whiwhi ai i ō puka tatauranga 2023

Ko tā mātou whai kia ngāwari rawa atu te whakaoti i te tatauranga mō ngā tāngata katoa. Heoi anō, he rerekē tēnei mahi, te whakangāwari, mō tēnā tangata, mō tēnā tangata, kei te āhua o ana hiahia.

Nā reira, he rerekē ā mātou ara tuku puka tatauranga, tohutohu hoki ki ētahi wāhi rerekē o te whenua. Ka takea mai ēnei tikanga i tō mātou mārama ki ō mua tatauranga, me ētahi atu hapori.

Kei te āhua tonu o tō noho, o te wāhi rānei e noho ana koe i ētahi wā, ka whiwhi pea koe i ō puka me ō tohutohu:

• i mua, i muri rānei i ētahi atu tāngata o tō hapori
• ka tukua tikatia mai ki a koe e tētahi kaikohi tatauranga, mā te mēra rānei.

I mua i te rā tatauranga, ka horaina atu ki a koe ngā mea e hiahiatia ana e koe hei whakaoti i te tatauranga

Ka tae ēnei ki tō kāinga noho (te wāhi e noho ana koe, e noho noa ana koe rānei i te nuinga o te wā). Ka tae mai tētahi o ēnei:

• he reta whai waehere uru, e āhei ai koe ki te whakaoti ā-ipurangi i te tatauranga
• he reta whai waehere uru, e āhei ai koe ki te whakaoti i te tatauranga mā te pepa, ki te hiahia koe.

Ahakoa kei hea koe e noho ana e āhei ai koe ki te kōwhiri kia whakaoti i te tatauranga mā te ipurangi, mā te pepa rānei.

I ētahi wāhi o te whenua, ka tukua e ngā kaikohikohi tatauranga he rauemi tatauranga ki ia kāinga noho

Mehemea e noho ana koe i tētahi o ēnei takiwā, ka tae atu tētahi kaikohi tatauranga ki tō kūwaha, me tētahi reta, me ētahi puka pepa. Ka wātea hoki rātou kia āwhina i tō whakaoti i te tatauranga.

Mehemea kāore koe i te kāinga, mā rātou e:

• hoki mai anō ā taihoa
• waiho te reta me ngā puka pepa i tō pouaka mēra

I ētahi atu takiwā o te whenua, ka tae atu ngā rauemi tatauranga ki te pouaka mēra

Ki te mea e noho ana koe i tētahi o ēnei takiwā, āta tirohia tō pouaka mēra mō tētahi o ēnei:

• tētahi reta whai waehere uru
• tētahi reta whai waehere uru, me ngā puka pepa.

I ngā kāinga noho mō te tini tangata, ngā kāinga rangitahi rānei, mā te tangata whakahaere e homai ngā rauemi tatauranga

Ko ngā kāinga noho mō te tini tangata, ngā kāinga rangitahi rānei ngā wāhi pēnei i ngā hōtēra, i ngā hōhipera me ngā kāinga noho mō te kaumātua.

Mehemea e noho ana koe i tētahi wāhi pēnei hei te rā tatauranga, mā te kaiwhakahaere e hoatu ngā mea tika ki a koe hei whakaoti i te tatauranga.

I muri i te rā tatauranga, ka hoki atu mātou mehemea kāore mātou i whiwhi i ō puka

Mehemea kāore mātou i whiwhi i ō puka katoa kua oti i muri i te rā tatauranga, ka whakapā atu mātou ki a koe. Kei te āhua tonu o tā mātou tuku i ngā rauemi tatauranga ki a koe, mā mātou e:

• peka atu ki tō kāinga noho, kotahi pekanga neke atu rānei, ki te kohi i ō puka, ki te āwhina rānei kia whakaotingia e koe
• tuku reta whakamahara ki tō kāinga noho
• peka atu ki tō kāinga, tuku atu hoki i ngā reta whakamahara ki a koe.