He kaupapa hou mō te Tatauranga 2023

He ngāwari kē atu ki te mahi

E mahi ana mātou kia ngāwari kē atu te mahi mā te katoa mō te tatauranga, kia hāngai ōna tikanga ki tā rātou e pīrangi ai, kia mahia wawetia hoki.

He whānui kē atu ngā whiringa i waenga i te mahi mā te ipurangi, i te mahi mā te pepa rānei

Kei tēnā tāngata kei tēnā tangata te whiringa mehemea ka mahia te Tatauranga 2023 mā te ipurangi, mā te pepa rānei. 

• Ka whiwhi ia kāinga i tētahi waehere uru hei whakaoti i te tatauranga mā te ipurangi.
• Ka whiwhi hoki 44 ōrau o ngā kāinga i ētahi puka pepa (he pikinga ake i te 3 ōrau o ngā kāinga noho i te tau 2018).

Ki te whiwhi puka pepa koe, ka taea tonutia e koe te mahi i te tatauranga mā te ipurangi. Ki te kore koe e whiwhi puka pepa, engari e hiahia ana koe kia pērā, ka taea e koe ēnā te tono, kāore he utu.

Ētahi atu tautoko i roto i ngā hapori

Ko tōna huarua tonu te rahi o ngā kaikohikohi tatauranga i roto i ngā hapori, tēnā i te Tatauranga 2018. Ka puta rātou ki te hapori nui ki te tohatoha puka, tohutohu hoki, me te tū hei kaitautoko.

Ka maha kē atu ngā rā me ngā hui tatauranga i roto i ngā hapori. Ka taea e te tangata ōna puka tatauranga te whakaoti i ēnei, te kimi tautoko rānei kia whakaotingia ā tōna wā.

He roa kē atu te wā mō te whakaoti i te tatauranga

Ehara i te mea me tatari rawa koe mō te rā tatauranga kia whakaoti koe i ō puka tatauranga. Ka taea e koe tēnei te mahi hei te taenga tonutanga o tō waehere uru, o ō puka pepa rānei ki a koe.

Ki te mahi wawe koe i te tatauranga, me hāngai tōnu ō whakautu ki a koe, ko wai koe, ā, ka noho koe ki hea hei te pō tatauranga.

He tohutohu, he mōhiotanga i roto i ngā reo me ngā hōputu whānui kē atu

Ka wātea ngā tohutohu me ngā mōhiotanga tatauranga i tēnei pae tukutuku i roto i:

• ngā reo tata ki te 30
• ētahi atu hōputu kē atu, tae atu ki:
  • ngā ataata Te Reo Rotarota o Aotearoa taitapa kati
  • ororongo
  • tānga Nui
  • Pānui Ngāwari
  • He kōnae tū tika mō te tuhi matapōs.

Te whakapiki i ngā wheako tatauranga mō te iwi Māori

E kawe ana mātou i te huhua o ngā mahi hei whakapiki i ngā wheako tatauranga mō te iwi Māori. Ko ētahi o ēnei mahi ka tīmata i ngā putanga raraunga pai kē atu, putanga tangata pai kē atu, putanga pātuitanga pai kē atu hoki.

Pānuitia ka pēhea te Hōtaka Tatauranga 2023 e whakamana ai i Te Tiriti o Waitangi

He reo pakari kē atu mō ngāi Maori i te Hōtaka Tatauranga

• Ko te Rōpū Raraunga o ngā Kaihautū Iwi/Iwi Leaders Group (DILG) tētahi wāhi o te rōpū ārahi, whakaruruhau hoki i te Tatauranga.
• Ka tuku mai Te Taumata Whakaritenga i ngā urupare, me ngā whakaaro.
• E whai wāhi ana te ao Māori ki ngā whakataunga take katoa o te tatauranga.

He kaha ake te tuituinga ki te iwi Māori

• Ko tō mātou whāinga kia pakari kē atu ngā hononga ki te tangata me ngā hapori. He whai tēnei kia pupuri ringa ō mātou tira tuitui, whakahaere tatauranga hoki.
• He huarua tonu te maha o ā mātou kaimahi tuitui, tēnā i te tau 2018. Neke atu i te haurua, he Māori
• E mahi tahi ana ō mātou tira tuitui ki ngā iwi Māori me te iwi Māori nui tonu ki te whakapiki i te whāinga wāhi ki te tatauranga, kia hora hoki i ngā raraunga Māori kounga tiketike.

Te piripono ki te reo Māori

• E tāpaetia ana te pae tukutuku tatauranga me te puka tatauranga ā-ipurangi ki te reo Māori.
• E tuku ana mātou i ngā puka pepa reo-rua i te reo Ingarihi/te reo Māori ki ngā rohe he nui ngā taupori Māori. E wātea ana hei tono i ētahi atu rohe katoa.
• E wātea ana hoki ētahi atu rauemi tautoko, tae atu ki te tautoko waea ki te reo Māori.

Te whakangāwari i te whakaoti i te tatauranga

• Ka ngāwari kē atu te whakauru i te piringa ā-iwi mā te ipurangi
  • Ka āhei te tangata whakauru tae atu ki te 16 iwi.
  • Kei tētahi mapi i te ipurangi ka kitea wawetia e te tangata kei whea tēnā iwi, tēnā iwi, huri noa i te whenua katoa.

Te whakapakari pūmanawa, raukaha Māori

• I raro anō te arahitanga a te Rōpū Raraunga o ngā Kaihautū Iwi/Iwi Leaders Group, kei te tautoko mātou i tētahi whakamātautau tātaritanga, kohinga hoki, mā te iwi e ārahi. Hei wāhi o ēnei mahi, ka kohia e ētahi tira ā-iwi ngā raraunga Tatauranga 2023 i ētahi wāhi e rua.

He hoahoa Māori i te tuatahi mō te whakamataara mō Tatauranga 2023

• I whakaingoatia e mātou tētahi umanga auaha tino matatau, tino nui āna mahi o mua ki te torotoro ki a ngāi Māori.
• Ka hāngai kē atu ā mātou ara whakawhiti kōrero, me ngā kōrero ake, ki a ngāi Māori.