He aha te tatauranga?
He uiuinga ā-motu te tatauranga hei tatau kia whai mana, i te maha o ngā tāngata me ngā whare kei Aotearoa. Ka puta i roto tētahi kapohanga whakaahua o te oranga, o ngā tāngata me ngā hapori ia rima tau.
Ko tā te Tatauranga (e kīa nei tōna ingoa tūturu ko te Tatauranga o Te Taupori me ngā Whare Katoa) he hora māramatanga mō te hunga katoa o Aotearoa me ō rātou kāinga noho. He whakaahua nui rawa tēnei o te katoa mō te noho o te tangata i ō tātou tāone nunui, i ō tātou rohe tāone iti, i te tuawhenua me ngā moutere o waho atu. I raro i te ture me whai wāhi atu ngā tāngata katoa ki te tatauranga.
Whakamahia ai ngā raraunga tatauranga e ngā rōpū huhua kia tutuki ō tātou hiahia, hei kirirarau, hei hapori hoki. Kia tino pai ai te whakaahua i a tātou, i ō tātou hapori, me ngā rōpū o te taupori e noho nei tātou, he mea hira kia rata katoa te iwi ki te whakakī i te tatauranga.
Ina whai wāhi atu koe ki te tatauranga, ka inoitia koe kia whakakī i tētahi, neke atu rānei, o ngā puka mōu, mō tō kāinga noho, me te hunga e noho tahi nā koe. Ina tuku mai koe i ēnei kōrero mōu, ka tiakina e mātou tō ingoa, tō kāinga noho, me tō nama waea kia tūmataiti, kia matatapu hoki.
Ka tangohia e Tatauranga Aotearoa ngā kōrero mai i ngā puka uiui o te katoa kia puta ai he huinga kōrero mō ngā tāngata, mō ngā hapori, mō ngā kāinga me te ōhanga katoa o Aotearoa. He mea nui tō tūmataitinga ki a mātou. Mā te whakahanumi i ngā kōrero mōu ki roto i ngā kōrero o te katoa i mua i te pānuitanga ki te ao, kua herea ngā kōrero katoa kia kore ai tētahi e tūpono ki tētahi aha mōu, mō tō wāhi noho, mō te hunga rānei e noho tahi nā koe.
Ko ētahi o ngā momo kōrero ka kohia e te tatauranga ko te toi o ngā kōrero ka puritia e tātou hei whenua motuhake. Hei wāhi o ēnei ko te āhua o te whakatāhuhu i ō tātou kāinga me ō tātou whānau, ngā huringa ki te kanorau ahurea i waenga i a tātou, ō tātou tohu mātauranga me te āhua o tā tātou haere ki te mahi, ki te kura hoki. Mā tō tātou mārama ki ēnei āhuatanga ka mōhio tātou he pēhea te pai o tō tātou whenua, me ōna āhuatanga huhua, hei ako hoki tēnei i a tātou me pēhea te whakapau i te hia piriona tāra puta noa i te motu, i waenga hoki i ō tātou hapori, kia pai ake ai te ao o āpōpō mō te katoa.