Hei āwhina te raraunga i a Asian Family Services ki te tautoko i ngā hapori puta noa i Aotearoa
Kua āhei a Asian Family Services ki te whakawhānui i ōna ratonga hei āwhina i ētahi atu hapori Āhia puta noa i Aotearoa, nā te whakamahi i ngā raraunga o Tatauranga 2018.
Kua tautoko Asian Family Services i ngā hapori o Āhia e noho ana i Aotearoa mai i 1998.
"E ū ana tā mātou titiro ki te āwhina i ngā hapori o Āhia kia whiwhi i ngā āwhina e tika ana mō rātou. E whāngaia ana ā mātou ratonga ārai wharanga petipeti ki te pūtea e te kāwanatanga, ā, e whakahaeretia ana e mātou te Asian Helpline i te motu katoa, me te hoatu āwhina taurima tūroro, ratonga hauora tūmatanui hoki, " te kī a Ivan Yeo, te Tumuaki Tuarua, te Kaiarataki Hauora Tūmatanui hoki, o Asian Family Services.
"Nā ngā mahi o tā mātou ratonga Asian Wellbeing Services, kua horaina e mātou te huhua o ngā ratonga hauora hinengaro, ahakoa ā-kanohi, nā Telehealth rānei, ā, kua tino āwhinatia te hauora o te pai o te noho o ō mātou hapori."
I ētahi rohe, kei te kaha ake te tupu o te taupori o Āhia i ētahi atu rōpū taupori.
"He mea hira te tautohu me te noho mārama ki ngā panonitanga o ngā hapori Āhia, mō ngā mahi e mahia ana e mātou," te kī a Ivan.
"Kei te tino piki te tokomaha o te hunga o Āhia i Te Whanganui-a-Tara, puta noa hoki i te Waipounamu. Nā te whakamahi i ngā raraunga taupori o te Tatauranga 2018, kua āhei mātou ki te tautoko i te take pakihi mō te whakawhānui i ō mātou ratonga i waho o Tāmakimakaurau.
"Kua whai tari mātou i Ōtautahi, i Te Whanganui-a-Tara hoki e hora nei i ngā hōtaka whakaheke wharanga petipeti, mā ngā āwhina taurima tūroro, me ngā ratonga hauora i waenga i te iwi. E tino whai painga ana ō mātou hapori o Te Whanganui-a-Tara me Te Waipounamu ināianei, nā tā mātou whakamahi i ngā raraunga tatauranga, nā te whakawhānuitanga o ā mātou raraunga ki aua rohe.
"He mea hira hoki kia whakawāteatia e mātou ō mātou ratonga, ā, e āwhina ana ngā raraunga tatauranga kia whakamahinetia, kia whakahāngaitia hoki ō mātou ratonga kia pai ake ai te tautoko i te hunga o Āhia i Aotearoa, kia kauwhau tikanga hoki ki ngā kaunihera me te kāwanatanga ā-motu mō ngā pūtake me ngā kaupapa here e pā ana ki ngā tāngata o Āhia me ō rātou hapori."
Ivan Yeo, te Tumuaki Tuarua, Kaiarataki Hauora Tūmatanui hoki, o Asian Family Services