Te tiaki i ngā mōhiotanga mōu i runga i te haumaru

E taurimatia ana te pūnaha nā mātou i waihanga hei kohikohi i ngā kōrero e homai nei i ngā puka tatauranga, i tētahi ratonga haumaru i āta tātaritia hei whakamahi mā te kāwanatanga o Aotearoa.

Ina whakakī koe i tō tatauranga, ka whakamunatia ngā kōrero nāu i whakauru, ā, kia tae mai rā anō ki Tatauranga Aotearoa, kātahi anō ka wetemunatia. Kia tae mai ngā kōrero mōu ki Tatauranga Aotearoa, ka rokirokitia ō whakautu ki ngā pātai i ētahi pūtahi raraunga kei roto i te kapua tūmataiti o te kāwanatanga.

Ko ngā kaituku e hāpai nei i ngā ratonga kapua tūmataiti, i āta whakamanaia e te Tari Taiwhenua i muri i tōna hātepe arotake hōhonu rawa, ā, e whakamahia ana e te huhua o ngā ratonga kāwanatanga. I āta kawea hoki e Tatauranga Aotearoa tāna ake hātepe kōwhiri, whakaū hoki i te pai, mō ngā ratonga kapua katoa e whakamahia ana.

Ka āhei ētahi atu tāngata i tōku kāinga te kite i ngā mōhiotanga i taku puka tatauranga?

E kore e kitea, engari māu e whakaae, ka taea e rātou te kite. E kore koe e herea kia whakakī i ngā puka tatauranga i mua i te aroaro o ētahi atu tāngata. Ka taea e koe tō puka te whakaoti ahakoa te wā, i roto i te wā o te tatauranga. Heoi anō nei te mea ka hiahiatia e koe ko te urunga ki te ipurangi, mehemea kei te mahia tuihonotia e koe.

Kia oti tō puka te tuku atu e kore tētahi atu i waho o Tatauranga Aotearoa e ahei kia kite i ngā kōrero o roto.

He pehea au e mōhio ai he haumaru tāku tuku i ngā kōrero mōku ki tēnei pae tukutuku?

Me titiro koe ki ētahi mea e rua, e mōhio ai koe kua tae koe ki te pae tukutuku tatauranga whai mana, he haumaru hoki tō whakauru i ō raraunga ki te puka tatauranga tuihono.

Āta titiro kua tae koe ki te pae tukutuku tika

Ko te wāhitau mō te pae tukutuku tatauranga whai mana ko census.govt.nz. Ko te wāhitau mō ngā puka tatauranga tuihono ko online.census.govt.nz

Mehemea kei te whakamahi koe i tētahi pae tukutuku kāwanatanga, āta tirohia te mutunga kia kitea kei te whakamahi te wāhitau tukutuku i ngā kupu “.govt.nz”. Ko te tikanga o tēnei, he pae tukutuku kāwanatanga whai mana. Ko ngā tari kāwanatanga o Aotearoa anake te hunga ka whakaaetia kia hanga pae tukutuku kāwanatanga, ā, me mātua tono whakaaetanga mai i te Tari Taiwhenua e taea ai.

Āta tirohia he hononga ipurangi haumaru tāu

Kimihia he maukati tūtata ki te pae wāhitau tukutuku i tō pūtirotiro, pāwhiritia rānei te pae wāhitau tukutuku, me te tiro mehemea ka tīmata te wāhitau tukutuku ki https. Tērā pea me rua rawa ō pāwhiri kia kitea te wāhitau katoa.

Ki te kitea ēnei mea e rua kua mōhio koe he hononga haumaru tō te pae e whakamahi nā koe. Ina tuku koe i ngā kōrero mā tētahi pae tukutuku whai hononga haumaru, ka whakamunatia.

Me pēhea koe e mōhio ai kua haumaru te tuku mōhiotanga ki ō tūmau?

I mua i tā mātou whakaae kia tukua tuihonotia tāna puka urupare e te tangata takitahi mā te ipurangi, ka whakapūmautia e mātou te taumata munanga i te pūtirotiro o tō pūrere. Me mātua whakamahi te pūtirotiro i ngā paerewa whakamuna e tika ana, kia haumaru ai te tuku me te whiwhi raraunga i a mātou.

Tērā anō ngā ritenga mahi kua oti te hanga ki roto i ā mātou pūnaha me ā mātou hātepe hei wawao i ngā kōrero mōu, i tua atu anō i te whakamuna, heoi anō, ka puritia aua āhuatanga kia matatapu i runga anō i ngā ritenga haumarutanga.