Te tautiaki i ngā mōhiotanga mōu

He toitū tonu tā mātou whakawhata i ngā kōrero mōu

Ka whakapipingia e mātou ētahi ngungu haumarutanga tino pakari kia tika ai te tiaki i ngā mōhiotanga. Ko ētahi o ēnei he whakaritenga ā-kiko, ā-hangarau, ā-whakahaere kua oti te whakamātautau mō te pakari, kia noho haumaru ai ō kōrero, i te wā tonu o tō tukunga i tō whakautu.

Kia oti ngā raraunga te tirotiro e mātou, ka whakaputua haumarutia e mātou ki tō mātou whatunga. Ka arotakea, ka aromātaia ngā take me ngā mōrea haumaru e tō mātou tira IT.

Ka puritia ngā mōhiotanga mō te wā tonu he hua tōna mō ngā mahi tatau, rangahau rānei. Kia tae ki te wā kāore i te hiahiatia, ka whakakorea e mātou.

Kāore mātou e tiri i ō kōrero whaiaro

Ka whakakotahitia ngā mōhiotanga mai i ngā puka tatauranga kia hua ake he āhuatanga e kīa nei he raraunga tōpū. Mā te whakahanumi i ngā kōrero mōu ki roto i ngā kōrero o te katoa i mua i te pānuitanga ki te ao, kua herea ngā kōrero katoa kia kore ai tētahi e tūpono ki tētahi aha mōu, mō tō wāhi noho, mō te hunga rānei e noho tahi nā koe.

Kimi kōrero anō mō te matatapu raraunga

Kore rawa mātou e tiri i ngā kōrero mōu ki tētahi tangata takitahi, ki tētahi rōpū, whakahaere rānei. Ka uru ki tēnei korenga e tuku ko ngā rōpū pēnei i te Manatū Whakahiato Ora, i Kāinga Ora, i Ngā Pirihimana o Aotearoa, i te Tari Tāke rānei.  

Te pānui i ngā raraunga tatauranga ki te iwi whānui

Mā tana whakamahi i ngā raraunga ka kohia i roto i te tatauranga, ka whakaputaina e Tatauranga Aotearoa te tatauranga nui tonu o ngā tāngata me ngā kāinga i Aotearoa, me ngā tatauranga taupori, pāpori, ōhanga hoki i ngā taumata ā-motu, ā-rohe, ā-hapori, ā-taupori iti hoki. Ka uru ki tēnei karangatanga ngā raraunga mō ngā iwi Māori me ō rātou tāngata, hapori hoki.

Ka whakawāteatia ngā raraunga tatauranga hei painga mō te katoa. Ka pānuitia i te pae tukutuku o Tatauranga Aotearoa, ka tukua tikatia atu hoki ki ngā kairangahau me ngā iwi ka whakapā mai ki a mātou ki te tono raraunga mai.

E kore mātou e tautuhi i te tangata takitahi i roto i ngā tatauranga me ngā rangahau kua oti te pānui ki te ao.

Ka honohonotia ngā raraunga kia nui kē atu te whai take

Ka honoa ngā mōhiotanga ka tukua mai e te tangata ki a mātou ki ngā mōhiotanga mai i ētahi atu hinonga. Mā konei ka nui kē atu te whai take o te mōhiotanga ki ngā kairangahau e whakautu pātai hira nei mō Aotearoa.

Ka puritia ēnei raraunga honohono, tōpū rānei, i ā mātou pātengi raraunga rangahau. Kei te Integrated Data Infrastructure (IDI) ngā raraunga meroiti mō ngā tāngata me ngā kāinga noho. Kei te Longitudinal Business Database ngā raraunga meroiti mō ngā umanga.

Ka āhei pea ngā kairangahau e mōhiotia ana he tino pono kia urutomo ki ngā raraunga ka puritia e mātou. He mea āta whakahaere, he haumaru te urutomo ki te raraunga. Ka āta tirohia e mātou ngā rangahau me ngā tatauranga katoa ka hua ake, kia mau ai te matatapu.