Ka whakamahia ngā rarauranga tatauranga mō te aha?

Whakamahia ai ēnei raraunga e ngā hinonga kāwanatanga, ngā kaunihera, ngā iwi, e ngā rōpū hapori me ngā umanga kia whakatau take e pā ana ki ngā ratonga ka whakamahia e tātou katoa, me te whakamahere mō aua ratonga. Mā te whai wāhi atu ki te tatauranga kei te āwhina koe kia mārama kē atu te tangata mō tō hapori me ōna hiahia. 

Te hauora me te toiora

Whakamahia ai ngā mōhiotanga tatauranga e te kāwanatanga hei whakamahere i ngā ratonga hauora pēnei i ngā hōhipera, waihoki ngā kaiwhakarato ratonga hauora, pāpori hoki kia kauwhautia ngā painga o te whakapakari i aua ratonga hauora, pāpori i ngā wāhi e hiahiatia ana. 

Te Mātauranga 

Whakamahia ai ngā mōhiotanga tatauranga e te kāwanatanga kia mārama me pēhea tāna whāngai moni ki ngā kura, tae atu ki ngā kaiako, me whakatū hoki aua kura ki hea.  

Ngā ratonga hapori 

Whakamahia ai ngā raraunga tatauranga e ngā kaunihera ā-rohe hei whakatatū i ngā wāhi tika mō ngā ratonga pāpori, pēnei i te whare pukapuka, i te papa tākaro rānei. 

Whakamahia ai ngā raraunga tatauranga e ngā rōpū hapori me ngā whakahaere hei tautoko i ngā tono pūtea, hei kauwhau hoki i ngā whakapainga e tika ana mō ō rātou hapori. Whakamahia ai ngā tauanga taupori tatauranga e ngā karapu ā-rohe kia mārama rātou mehemea he rahi ngā tāngata hei whakatū tira hākinakina.  

Whakamahia ai ngā raraunga e tō hāhi pea kia mōhio rātou mehemea he rahi ōna whare mō te hunga piri ki taua hāhi, kia mārama hoki ki ngā ratonga tērā pea e hiahiatia e ngā tāngata o ō rātou hapori. 

Te waka kawe, te ipurangi me ētahi atu hangaroto 

Whakamahia ai ngā raraunga tatauranga e te kāwanatanga me ngā kaunihera ā-rohe hei whakatatū i ngā wāhi tika mō ngā waka kawe, mō ngā rori, mō te hiko, mō te ipurangi, mō te wai, me ngā ratonga ipurangi, tokohia hoki te hunga ka whakamahi i aua ratonga.  

Te whai whare 

Whakamahia ai ngā raraunga tatauranga e te kāwanatanga me ngā kaunihera ā-rohe mehemea he rahi ngā whare o Aotearoa mō ō tātou whānau, me whakatū whare hou ki hea, he pēhea hoki te āhua o te pai o ngā whare o ōna tāngata. 

Ngā Iwi 

Ka whakamahi pea ngā iwi i ngā raraunga tatauranga kia mārama kē atu rātou ki tō rātou iwi, e noho ana ki hea, he pēhea hoki te pai o te noho. Hei āwhina tēnei i ngā mahi whakamahere mō ngā whakatupuranga kei te ara ake, ka noho hoki hei tūāpapa mō ngā whiwhiringa tuku pūtea, whakatū ratonga me ērā atu kōkiri. 

Ngā Umanga 

Whakamahia ai ngā raraunga tatauranga e ngā umanga hei whiriwhiri take haumi moni, hei tautuhi hoki me pēhea tā rātou whakatutuki hiahia mō ā rātou hua hokohoko, ratonga hoki. 

Te Rangahau 

Whakamahia ai ngā raraunga tatauranga e ngā kairangahau kia mārama ki ngā āhuatanga pēnei:

• he pēhea te pānga o te whare kāhekaheka, mākū hoki ki te hapori 
• tokohia ngā tāngata kāore i te whai wāhi wātea ki te wai mā, ki ngā kura, ki ngā hōhipera rānei
• he pēhea te tupu o tēnei mea te hapori, he pēhea hoki i rerekē ai i roto i te wā, he aha hoki ngā ratonga ka whakamahia e rātou, ka hiahiatia hoki e rātou.