Ngā ture whakamahi

Ko ngā ture whakamahi mō tēnei pae tukutuku ko ngā ture me mātua whai e koe, e whakaaetia ai tō whakamahi i ēnei pae tukutuku. Ki te kōwhiri koe ki te whakamahi i tēnei pae tukutuku, ka kīa tērā tō whakaaetanga ki te mahi i raro i ēnei ture.

Mō tēnei pae tukutuku

Ko tēnei pae, arā, Census.govt.nz (‘tenei paetukutuku’) he pae tukutuku e whakahaeretia ana e Tatauranga Aotearoa hei whakamōhio i te tangata mō te āhua me te kawenga o te Tatauranga o Te Taupori me ngā Whare Katoa o Aotearoa.

Ka pā ngā ture whakamahi me te manatārua e tuhia atu nei i tēnei whārangi ki te pae tukutuku katoa, tae atu ki ngā hononga/pae tukutuku/ URL katoa, tīmata mai i ‘census.govt.nz’ me ‘online.census.govt.nz’.

Me uru mai koe ki tēnei pae tukutuku mā te pūtirotiro paerewa anake

E tūtohu ana mātou kia tomo koe ki census.govt.nz me online.census.govt.nz mā te whakamahi i ngā pae tukutuku me ngā pūmanawa pānui-mata paerewa anake, kia tika ai te rere o ōna āhuatanga katoa.

Kaua e tahuri ki te tomo ki tēnei paetukutuku mā ētahi atu o ēnei huarahi, ki te kore mātou e whakaae i te tuatahi, arā:  

• te wakuwaku, te kōwhakiwhaki rānei
• te tārua waehere, ngā taumahinga rānei 
• te keri raraunga
• te whakamahi karetao, pūwerewere rānei 
• te whakamahi pūmanawa aunoa, te whakamahi i ētahi atu tikanga kohi raraunga, tīrou raraunga rānei.

Kaua e tāruaruatia tēnei pae tukutuku, kaua e tomo ki ētahi o ana taumahinga whakahaere, whakawhanaketanga rānei, ki te kore mātou e whakaae i te tuatahi. 

Ngā raraunga me ngā mōhiotanga i tēnei pae

Ka mahi nui mātou kia tika kia pono ngā mōhiotanga i tēnei pae, kia hou hoki, engari kāore e kī taurangi he pērā. 

Ko tā mātou tūtohu ki a koe, kia:

• aromātai mehemea he tōtika, he tika, he hou rawa, he whānui, he hāngai hoki mō ō mahi ngā mōhiotanga i tēnei pae tukutuku
• kimi tohutohu mai i te hunga ngaio mō ō mahi mehemea kei te whakamahi koe i ēnei mōhiotanga mō ētahi whakatau hira. 

Te pūhara me ngā utauta

I āta kōwhiria e mātou te pūhara me ngā utauta e whakamahia nei e mātou mō tēnei pae, engari, i runga i te mōhio he kōwhao tonu tō te ipurangi, e kore e taea e mātou te kī taurangi ka pērā. Ka noho ki a koe tonu te haepapa kia whakahaumarutia tō pūnaha rorohiko.

Te haepapa mō ō mōhiotanga tatauranga

Tēnei a Tatauranga Aotearoa te whakaae nei kia noho haepapa mō te haumarutanga o ngā mōhiotanga ka tukua mai a koe ki a mātou, ā, ka mahi mātou i runga i te tūpato kia noho haumaru ngā raraunga ka tukua mai mā te ipurangi.

Ētahi atu pae tukutuku ehara a Tatauranga Aotearoa i te kaiwhakahaere

Ka āta mahi nui mātou kia tūpato ina hono ki ētahi atu pae tukutuku, engari kāore ō mātou mana whakahaere i aua pae, ki ngā āhuatanga ka puta ake rānei ina uru atu koe ki reira.

Ko te whakaaro kia whai take ngā hononga me ngā tohutoro ki ētahi atu pae tukutuku, whakahaere, tāngata rānei i waho i Tatauranga Aotearoa, engari ehara i te kupu tautoko.

Ka riro māu e:

• aromatawai mehemea he tōtika ngā mōhiotanga i ēnei pae tukutuku mō ō whāinga mahi
• arotake haere tonu ngā here, ngā whakaritenga me ngā kaupapa here tūmataitinga.

Te toitū o te ratonga 

Kāore mātou e kaha ki te kī taurangi ka wātea tonu tēnei pae tukutuku hei whakamahinga māu. Ki te mea e tika ana, ka wetehonotia tēnei pae e mātou i te ipurangi, ka tangohia rānei ētahi o ōna mōhiotanga. Ka pā pea tēnei āhua ahakoa te wā, ehara i te mea me mātua whakamōhio mātou i a wai rānei. 

Ngā whakahoutanga i ēnei whakaritenga mahi 

Tērā pea ka whakahoutia e mātou ēnei whakaritenga mahi. Ka whai mana ngā whakaritenga hou atu i te pānuitanga o te whārangi hou mō ngā Ture Whakamahi.